Карантин талаптарын сақтау іс-шарасы бойынша Сарыағаш АПБ-нің қызметкерлері кезекті рейд шараларын жүргізуде. Мобильдік топ мүшелері қаладағы тамақтану орындарында, сауда үйлерінде, азық-түлік дүкендері мен ойынханаларда санитарлық талаптар мен карантин режимінің сақталуын қадағалауда. Осы тұста карантин талаптарына немқұрайлы қарап, түнгі уақытта санитарлық нормаларды бұзған кафе, ойынхана, дүкендер жайты анықталып, оларға түсіндірме жұмыстары жүргізіліп, хаттама толтырылды.
Бүгінгі таңға дейін Сарыағаш ауданының полицейлері атқарған іс-шаралардың нәтижесінде карантин талабын орындамағандардың 145-ке жуығы заң бұзуға жол берген. Олардың басым көпшілігі белгіленген уақыттан кейін де жұмыс жасап тұрған дүкен мен ойынхана, тойхана иелері. Мысалы, Сарыағаш қаласында түнгі 12 шамасында «Әлібек ата» дүкені ашық тұрғаны анықталған.
Сондай-ақ бильярд ойынханалары сағат 23:00-ден кейін жұмыс жасап жатқандығы белгілі болды. Ойынханаға келуші азаматтардың да ешбірінде медициналық бетперде болмаған. Сонымен қатар індет өршіп тұрған уақытта жиын, той жасаушылар қатары да азаяр емес. Ашығын айтқанда, Сарыағаш қаласындағы бірнеше дүкендер мен ойынханалар анықталып, әкімшілік хаттама толтырылды.
Түркістан облысы Полиция департаменті карантин режимі кезінде бекітілген талаптарды орындамай, тұрғындардың денсаулығына қауіп төндіретін азаматтар тиісті жауапқа тартылатынын ескертеді. Сондықтан Бас санитарлық дәрігердің қаулысының талаптарын қатаң сақтау, бетперде кию және арақашықтықты сақтауды естен шығармаңыз.
ТО ПД-нің баспасөз қызметі
