Ішкі істер министрлігі қазақстандықтарға полиция қызметкерлерінің жаңа киім үлгісін белсенді түрде талқылауға шақырды.
Бүгін министрлік Instagram әлеуметтік желісіндегі жеке парақшасында тәртіп сақшыларының жаңа киім үлгісін таныстырды.
Ведомство таратқан мәліметке сәйкес, полиция қызметкерлерінің киім үлгісі соңғы рет 2005 жылы өзгерген. Ол заманауи талаптарға сай келмейді. Осы орайда ІІМ полиция қызметкерлерінің жаңа киім үлгісіне қойылатын негізгі талаптарға тоқталып, тәртіп сақшылары жаңа үлгіге бірден емес, кезең-кезеңімен көшетінін атап өтті.
«Нысанды киім-кешектерге қойылатын негізгі талаптар - оның тартымдылығы, ыңғайлылығы және артық элементтердің болмауы. Нысанды киімдердің дизайнына, дайындалуына қосымша қаражат талап етілмейді. Полиция қызметкерлері нысанды киім-кешектермен кезең-кезеңмен қамтамасыз етіледі. Ол ескірген нысанды киімді ауыстыруға бөлінетін жыл сайынғы қаражат есебінен жүзеге асырылады», - делінген хабарламада.