Көктемі ерте келетін Оңтүстік өңірлерде зиянкестермен күрес жұмыстары жыл сайын жүргізілетіні мәлім. Соған қарамастан биыл бұл өңірде шегіртке қаптады деген ақпарат әлеуметтік желілерде желдей есіп жүр. Бұл қаншалықты рас? Бұл сұраққа Ауыл шаруашылығы министрлігінің ресми өкілі Олжас Тлебалдин жауап берді. Оның айтуынша бұл мәліметтер шындыққа жанаспайды деп жазады RGmedia.kz тілшісі.
— Биыл үйірлі шегірткелер 2,1 млн гектарға дейін жайылуы мүмкін деп болжанған. 20 мамырдағы жағдай бойынша 2,3 млн гектардан астам аумақ зерттеліп, 429 мың гектар жерге химиялық өңдеу жүргізілді. Түркістан және Жамбыл облыстарында мароккалық шегірткеге қарсы өңдеу жұмыстары 95% аяқталды, қазір қосымша тазарту жүргізіліп жатыр. 11 өңірде итальяндық прус пен азиялық шегірткемен күрес жалғасып жатыр. Мониторингке 4600-ден астам маман тартылған. Қорғаныс шараларында заманауи, жоғары тиімді пестицидтер қолданылды, — деді Олжас Тлебалдин.
Сондай-ақ, жұмысқа 443 арнайы техника жұмылдырылды. Өңірлерде облыс әкімдері орынбасарларының басшылығымен жедел штабтар құрылды. Жағдай мемлекеттік инспекция комитетінің тұрақты бақылауында, деп қорытындылады Тілебалдин.