«AMANAT» партиясының сайлауалды бағдарламасындағы басты міндеттердің бірі – елдегі білім саласын мейлінше жақсарту.
Осы міндеттердің орындалуы, аймақтық білім саласын дамытудағы өзекті мәселелер педагогтардың дәстүрлі тамыз кеңесінде сөз етілді. Түркістан қаласындағы «Конгресс холл» көпсалалы кешенінде «Білім келешегі: Адал азамат, Кәсіби маман» білім саласы қызметкерлерінің облыстық тамыз кеңесі Мемлекет басшысы жариялаған Жұмысшы мамандықтары жылына арналып, ұлттың жаңа сапасын қалыптастыру, білім берудің озық үрдістерін енгізу, өз ісін жетік білетін кәсіби мамандар даярлау мәселелеріне арналды. Облыс әкімі Нұралхан Көшеровтың қатысуымен өткен Тамыз кеңесіне ҚР Оқу-ағарту бірінші вице-министрі Майра Мелдебекова, облыс прокурорының орынбасары Дәулет Тлемисов, сондай-ақ бірқатар республикалық мекемелердің өкілдері қатысты. Тамыз кеңесінің пленарлық отырысына мыңға жуық ұстаз қатысып, 20 мыңнан астам мектеп мұғалімдері онлайн форматта көріп отырды.
Кеңес аясындағы көрме барысында білім саласындағы заманауи инновациялық жобалардың таныстырылымы болып өтті. «EDUS.KZ» ақпараттық-бағдарламалық кешенінің таныстырылымы, «KUNDELIK.KZ» цифрлық білім беру экожүйесінің артықшылықтары, «BILIM CENTER», «BILIM USTAZ», «ONLINE MEKTEP» және басқа да цифрлы ресурстары жөнінде мәліметтер келтірілді.
Нұралхан Көшеров өз сөзінде ол білім беру саласына мемлекет тарапынан көрсетіліп жатқан қолдау мен қоғам алдындағы жауапкершілік мәселесіне тоқталып өтті. Түркістан аймағындағы білім деңгейі дамудың жаңа кезеңіне қадам басты. Сондай жобалардың бірі халықаралық беделі жоғары Оңтүстік Кореяның «Woosong Kazakhstan» IT университетінің Түркістан қаласындағы филиалының ашылуы. Осы жоғары оқу орнына облыс әкімдігі тарапынан 100 грант бөлінді.
«2024 жылы білім беру саласына 747,7 млрд теңге бөлінді. Бұл – жалпы облыстық бюджеттің 55 пайызын құрайды. Бұл – болашақ ұрпаққа салынған нақты инвестиция. Облыста 6 жасқа дейінгі балаларды мектепке дейінгі тәрбиемен қамту көрсеткіші 99%-ға жетті. Бұл еліміздегі ең жоғарғы көрсеткіш. Облыстық бюджет есебінен жаңа 17 білім нысанының құрылысы жүргізілуде. Балалардың жазғы демалысына ерекше көңіл бөлініп, 5 мемлекеттік лагерге жөндеу жүргізіліп, 5 лагерге қосымша модульдік ғимараттар салынды», деп мәлімдеді облыс басшысы.
Мектептерді жаңғырту (реновация) жобасы аясында облыстағы 115 мектеп кезең-кезеңмен жөндеуден өтуде. Жалпы, Түркістан өңіріндегі мектептерде бүгінгі таңда 67 мыңнан астам педагог еңбек етеді. Биыл олардың кәсіби деңгейін арттыруға ерекше көңіл бөлінді.
«AMANAT» партиясы қабылдаған Сайлауалды бағдарламасында облыс көлемінде жаңа мектептердің салынуы көзделген. «Келешек мектептері» ұлттық жобасы аясында Түркістан өңірінде 29 жаңа жайлы мектептің құрылысы жүргізілуде. Былтыр 13 мектеп есігін айқара ашса, жыл соңына дейін және 16 мектеп пайдалануға беріледі деп күтілуде. Осылайша өлкемізде үш ауысымдық мектеп мәселесі өз шешімін таппақ.
Ғалымжан Елшібай,
Түркістан облыстық мәслихатының депутаты
