Шымкент қаласының әкімі Ерлан Айтаханов зиялы қауым өкілдерімен кездесті. Ел ағалары өз тараптарынан тілектерін жеткізіп, жаңадан тағайындалған шаһар басшысына ақ баталарын берді.
Әңгіме барысында қоғамның бірлігі мен ынтымағын арттыру және қала мәдениетін дамыту жайы сөз болды. Өз кезегінде, қала әкімі арнайы келген ел ағаларына алғысын білдіріп, алдағы жұмыс жоспарымен бөлісті.
– Мемлекет басшысы Шымкент қаласын өркендету және қала тұрғындарының өмір сүру сапасын арттыру бойынша нақты тапсырмалар беріп отыр. Яғни, қаланың шеткі аймақтарындағы шағынаудандардың инфрақұрылымын дамыту – басты тапсырмаларының бірі. Осы бағыттағы жұмыстарды жандандыратын боламыз, – деді Е.Айтаханов.
Сонымен қатар, Ерлан Қуанышұлы түрлі салаларда еңбек етіп, зейнетке шыққан аға буын өкілдерімен бірге әлеуметтік салалардағы ауқымды мәселелерді талқылады.
Сөз соңында қала басшысы зиялы қауым өкілдерін келер жылы өтетін Тәуелсіз мемлекеттер достастығының мәдени астанасы жылын абыроймен өткізу үшін бір кісідей атсалысуға шақырды.