Қасым-Жомарт Тоқаев Жолдауларында елдегі патерналистік көңіл-күй мен әлеуметтік масылдық мәселесін жиі көтереді. Президенттің айтуынша, Конституция бойынша әлеуметтік мемлекет ретінде қиын жағдайға тап болғандарға көмектесуге міндетті, бірақ кейбір қазақстандықтар мемлекеттік әлеуметтік бағдарламаларды жеке мүддесіне пайдаланады, сондықтан мұнымен күресу керек.
Елімізде патерналистік көңіл-күймен күресу үшін аш адамға балық берме, қармақ бер қағидасын ұстанатын бағдарламалар жүзеге асырылуда. Соның бірі қайтарымсыз грант – азаматтарды масылдықтан арылтып, тұрмысын түзеуге септігін тигізуде.
Осы орайда Шымкент қаласында жаңа бизнес-идеяларды жүзеге асыруға бағытталған мемлекеттік гранттар берудің алғашқы кезеңі сәтті аяқталды. Қаржылай қолдау алуға ниет білдірген 934 адамның ішінен арнайы комиссияның шешімімен, 134 үміткердің жобасы мақұлданып, әрқайсысына 400 айлық есептік көрсеткішке дейін, яғни 1 572 800 теңгеге дейінгі мөлшерде қайтарымсыз грант тағайындалды. Қазіргі таңда жеңімпаздар Еңбек мобильділігі орталығымен екіжақты келісімге қол қойып, қаржы аудару рәсімдері жүргізілуде.
Грант иегерлерінің басым бөлігін әлеуметтік осал топ өкілдері құрап отыр. Олардың арасында атаулы әлеуметтік көмек алатындар, асыраушысынан айырылған азаматтар, мүмкіндігі шектеулі жандар, көпбалалы отбасылар және мүгедек бала тәрбиелеп отырғандар бар. Атап айтқанда, 5 адам – атаулы әлеуметтік көмек алушы, 7 – асыраушысынан айырылған, 23 – мүгедектігі бар еңбекке қабілетті азамат, 71 – көпбалалы отбасы, 28 – мүгедек бала тәрбиелеп отырған ана немесе әке.
Мақұлданған жобалар түрлі салаға бағытталған. Қызмет көрсету саласы алдыңғы қатарға шықса, бұл бағытта 50 жоба қаржыландырылды. Өндіріс саласында – 39 жоба, тігін – 15, кондитерлік және наубайхана өнімдері – 14, жартылай дайын тағамдар – 9, мал және құс шаруашылығы – 2, жиһаз өндірісі бойынша – 1 жоба мақұлданды. Сонымен қатар фаст-фуд, сусындар мен шұжық өнімдерін өндіру секілді бағыттарда 4 жоба қолдау тапты.
Мемлекеттік гранттар азаматтардың кәсіпкерлік бастамаларын қолдап қана қоймай, олардың табыс көзін арттыруға және жаңа жұмыс орындарын ашуға жол ашады. Алдағы уақытта грант иелері өз жобаларын толық жүзеге асырып, қаланың әлеуметтік-экономикалық дамуына өз үлестерін қоса бастайды.