Түркістан облысында көлік саны 15 мыңға көбейді. Бұл туралы облыстың Полиция департаментінің бастығы, полиция генерал-майоры Қайрат Дәлбеков бүгін ел алдындағы есебінде айтты деп хабарлайды RGMEDIA.KZ ақпарат агенттігінің Түркістан қаласындағы тілшісі.
– Жол апаты оқиғаларының азаймауына бірінші себеп көлік басқарушылардың жылдамдықты асырып, жол ережесін бұзып қателіктерге жол беруі болса, екінші себеп қараусыз малдардың жол бойына шығып кетіп, жол қозғалысына кедергі келтіруі. Үшінші себеп ретінде облыс орталығы болғандықтан адам мен көлік санының артуын айтуға болады. Статистикаға сүйенер болсақ, облыстың өзінде 2018 жылмен салыстырғанда 2019 жылы көлік саны 15 мың 121-ге көбейген. Яғни, 391 мың 177-ден 406 мың 298-ге жетті. Төртіншіден, 4-ші себеп полиция тарапынан қаншама қызметкерлерді профилактикалық жұмыстарға жұмылдырсақ та заңды бұзатын жүргізушілер саны азаяр емес. Сондықтан біз профилактикалық іс-шаралар санын бұдан әрі қарай да көбейте түсетін боламыз, – деді департамент бастығы.