Қазақстанның Премьер-министрі Асқар Мамин Түркістан облыстық Қоғамдық денсаулық басқармасының басшысы Мұқан Егізбаевтың еңбегін жоғары бағалады. Үкімет басшысы мұндай ризашылығын Түркістан облысына жасаған сапарында білдірді.
Күрделі жөндеуден өткен Арыс қалалық орталық ауруханасының жұмысымен танысқан Асқар Ұзақбайұлы Түркістан облыстық қоғамдық денсаулық басқармасының басшысы Мұқан Кеңесбекұлы мен аурухана қызметкерлерінің жұмысына жоғары бағасын беріп, ризашылығын білдірді және алдағы жұмыстарына сәттілік тіледі.
Күрделі жөндеуден кейін жаңарған емдеу мекемесіндегі жұмыстардың сапасына аса мән берген Үкімет басшысы аурухананың медициналық қондырғылармен толық жабдықталғанын тілге тиек етті. Қарқынды да қажырлы еңбектің арқасында аяқталған ауқымды істің халық игілігі үшін жасалғанын баса айтқан Асқар Мамин өңіріміздің бас дәрігері Мұқан Егізбаевтің елеулі еңбегіне ерекше баға берді.
Арыста орын алған апаттан кейін толық жөндеуден өткен ауруханада толыққанды заманауи «Триаж жүйесі» іске қосылып, медициналық ақпараттық жүйесімен қамтылған. Арнайы қызыл, сары, жасыл түсті бағыттарға арналған принтерлермен жабдықталып, электрондық қолтаңбалар орнатылды.