Түркістан облысында Қоссейіт ауылының тұрғыны 41 жастағы Алмас Садақбаевқа дәрменсіз күйдегі әкесіне зорлық көрсету және денсаулығына орташа ауырлықтағы зиян келтіру айыбы тағылып, сот процесі басталды.
Сот Жетісай аудандық сотында өтіп жатыр. Бүгінгі отырыста куәгерлер сөз сөйледі. Куәгерлердің айтуынша, қарияға көрсетілген зорлық әрекеттердің видеосы алдымен жергілікті чаттарда тараған.
Іс бойынша куәгер, ауылдық амбулатория дәрігері Гүлжан Чукманова видеоны көрген соң Қоссейіт ауылдық округінің әкімі Нұрбол Жайнарға хабарласып, айыпталушымен сөйлесуді сұраған. Әкім қарияны үйінде барып көргенін айтып, ол кезде марқұмның төсекте жатқанымен күтімі жақсы болғанын жеткізген.
Сот отырысында Нұрбол Жайнар айыпталушының әкесі қайтыс болғаннан кейін ғана видеоны көргенін айтып, Садақбаевты әңгімеге шақырып, кездесуге учаскелік полиция қызметкерін де қатыстырғанын хабарлады.
Алайда Алмас Садақбаев әкесіне зорлық көрсеткенін жоққа шығарып, қарияның ауыр науқаста болғанын және оған күтім жасаудың қиын болғанын алға тартқан. 2 қыркүйекте марқұм көз жұмған.
Жергілікті дәрігерлер өлімнің табиғи себептен болғанын растайтын анықтама берген. Дегенмен қылмыстық іс қозғалған соң, тергеу барысында мәйіт эксгумацияланған.