Қазақстан Республикасының туристік саласын дамытудың 2019 - 2025 жылдарға арналған мемлекеттік бағдарламасы аясында Шымкент қаласында туризмді дамыту шаралары қолға алынуда. Республикадағы туристер жиі аяқ басатын шырайлы Шымқалада қонақтарды қызықтыратын бастамалар көп. Осы орайда қаланың тарихи әрі киелі туристік орны саналатын Қызыр Пайғамбардың мұнарасына жақында құрылыс жұмыстары жүргізілетін болды. Бұл туралы Шымкент қаласы әкімінің орынбасары Мақсұт Исахов фейсбук әлеуметтік желісінде жазды.
– Шымкентте Мұса пайғамбардың серігі саналатын Қызыр Пайғамбардың 18-19 ғасырларға тән тарихи мұнарасы бар. Сайрам тұрғын алабында орналасқан бұл нысан – туристік, мәдени, ерекше нысандарымыздың бірі. Мұнара әлемге әйгілі Пизан мұнарасы секілді 15’С-қа оңға қарай қисайған. Нысанның биіктігі 10,5 м болып, жер сілкінісінің нәтижесінде қазір 5,7 метрге жеткен, – деген М.Исахов аталған нысанға құрылыс жұмыстары жүргізілуі қажет екенін атап өтті.
– Кейінгі кезде мұнараның, өзге де ескерткіштердің сыртқы келбеті нашарлап, күтіп-баптауды, құрылыс жұмыстарын жүргізуді қажет етуіне байланысты біздің туризм орталығы меценаттардың көмегімен жаңа жобаны қолға алып жатыр. Жобаға алғаш болып қаламыздың тұрғыны, меценат Бауыржан Мырзатаев мырза демеушілік көрсетіп, тарихи мұнараның аумағын абаттандыруға қолғабыс жасап, жөндеу жұмыстарын жүргізуде. Аяқталған соң, тағы бөлісе жатармыз, – деді Мақсұт Пернебайұлы.