Еңбек адамына құрмет көрсету, оның құқықтары мен мүдделерін қорғау – әлеуметтік әділетті қоғам құрудың басты қағидаттарының бірі. Осы бағытта Шымкент қаласында жүйелі жұмыс жүргізіп келе жатқан маңызды қоғамдық құрылымдардың бірі – «Шымкент қаласы кәсіподақтар орталығы» аумақтық кәсіподақтар бірлестігі.
Кәсіподақтар орталығы еңбек адамының әлеуметтік-экономикалық құқықтарын қорғауды басты міндет ретінде қарастырады. Бірлестік жұмыс берушілер мен еңбек ұжымдары арасындағы әлеуметтік әріптестікті дамытуға, еңбек заңнамасының сақталуына қоғамдық бақылау жүргізуге белсенді түрде атсалысады. Бұл өз кезегінде жұмысшылардың еңбек жағдайын жақсартуға, қауіпсіздік талаптарының орындалуына және тұрақты еңбек қатынастарының қалыптасуына ықпал етеді.
«Шымкент қаласы кәсіподақтар орталығы» еңбек адамының қоғамдағы беделін көтеруге бағытталған бірқатар бастамаларды жүзеге асырып келеді. Әртүрлі сала қызметкерлерінің жетістіктерін насихаттау, үздік еңбек адамын марапаттау, кәсіби мерекелер аясында ұйымдастырылатын іс-шаралар жұмысшы мамандықтарға деген құрметті арттыруға қызмет етеді.
Бірлестік еңбек адамының тек өндірістегі рөлін ғана емес, оның қоғамдағы орны мен әлеуметтік маңызын кеңінен түсіндіруге басымдық береді. Бұл – жастарды еңбекке баулуда, жұмысшы мамандықтарға қызығушылықты арттыруда маңызды фактор.
«2025 жыл елімізде Жұмысшы мамандықтар жылы ретінде ерекше мәртебеге ие болды. Бұл тек күнтізбедегі белгі емес — қоғамның ең басты тірегі болып тұрған еңбек адамын бағалаудың жаңа белесі. Бүгінгі өндіріс жаңарып, технологиялар өзгерген сайын жұмысшы мамандықтарының бағасы тіпті жоғарылап келеді. Электромонтер, жүргізуші, құрылысшы, технолог, зертхана маманы, тігінші, оператор – осындай мыңдаған еңбек иесінің адал қызметі қалаларымыздың дамуын, қоғамның тұрақтылығын қамтамасыз етіп отыр. Бұл — бағасын уақыт еш төмендетпейтін адал еңбек. Шымкент қаласы кәсіподақтары үшін биылғы жыл ерекше серпін әкелді. Біз еңбек адамының мәртебесін көтеру бағытындағы ақпараттық жобаларды күшейтіп, оқыту бағдарламаларын кеңейттік, әлеуметтік қорғау шараларын нақтылай түстік. Әсіресе жастарға — колледж студенттері мен жас мамандарға қолдау көрсету басты назарда болды. Жас буын өз мамандығын сеніммен таңдап, болашағына нық қадам жасау үшін кәсіподақ әрдайым жанынан табылуға дайын. Біз жұмыс берушілермен ынтымақтастықты күшейтіп, әділ еңбекақы, қауіпсіз еңбек жағдайы, еңбек құқығын қорғау бағытында жүйелі жұмыс жүргізіп келеміз. Жұмысшы мамандықтар жылы осы міндеттерге жаңа серпін берді. Бүгін атқарылған істі сараласақ, бір нәрсе анық: қоғам еңбек адамына деген құрметін күшейте түсті. Қолымен, білімімен, тәжірибесімен күн сайын қызмет етіп жүрген әр маман – еліміздің берекесі мен дамуының негізгі күші. 2025 жыл аяқталып келеді, бірақ кәсіподақтың міндеті ешқашан тоқтамайды. Еңбек адамы – біздің барлық жұмыстың өзегі. Біз әрбір еңбеккердің жанынан табылып, оны қолдауды, қорғауды және жаңа мүмкіндіктер ашуды жалғастыра береміз»,- дейді «Шымкент қаласы кәсіподақтар орталығы» Аумақтық кәсіподақтар бірлестігінің төрағасы Бауыржан Алтеев.
«Шымкент қаласы кәсіподақтар орталығы» аумақтық кәсіподақтар бірлестігі – еңбек адамының мүддесін қорғап қана қоймай, оның қоғамдағы мәртебесін көтеруге елеулі үлес қосып отырған маңызды қоғамдық институт. Еңбек адамын дәріптеу арқылы кәсіподақтар орталығы әлеуметтік тұрақтылықты нығайтып, әділетті әрі еңбекке негізделген қоғам қалыптастыруға қызмет етіп келеді.