Әрбір адамның жүрегінде бір мамандыққа арналған ерекше сүйіспеншілік, адалдық және жігер жатады. Біреу үшін бұл – жай ғана жұмыс, ал біреу үшін – өмірінің мәні мен мақсатына айналған қасиетті жол. Шынайы берілгендікпен атқарылған еңбек адамды биікке көтереді, қоғамға пайда әкеледі, айналасына ізгілік сыйлайды. Осындай өз ісіне жан-тәнімен беріліп, мамандығын жүрек қалауымен таңдаған абыройлы жандардың бірі – ветеринар Самал Жарықбасова.
Самал үшін еңбек – жауапкершіліктің ғана емес, адамға деген құрметтің өлшемі. Ол таңдаған мамандықтың әр күні – жаңа міндет, жаңа ізденіс, жаңа жетістік. Адамдармен жұмыс істеу, олардың мәселесін шешу, дұрыс бағыт көрсету – ол үшін тек қызмет емес, азаматтық борыш, жүректің шақыруы.
Ол – жан-жануардың жанашыры, адал қызметкер, аяулы ана, отбасының берекесі. Оның еңбегі – тек кәсіп қана емес, үлкен жауапкершілік пен мейірімділікті талап ететін ізгі жол. Ветеринар болу – тек мамандық емес, жүрекке жақын міндет. Өйткені жануарлар тілсіз тіршілік иесі, олардың дертіне дауа тауып, емдеп, саулығын сақтаудың жауапкершілігі үлкен.
Әрбір науқас жануардың тағдыры – оған аманат. Самал Бақытқызы күн сайын түрлі жағдаймен бетпе-бет келеді: бірінде ауыр операция жасаса, бірінде ауыл шаруашылығындағы аса маңызды профилактикалық жұмыстарды жүргізеді. Қай жағдайда да ол сабырлы, ұқыпты, жануарға жанашыр.
Әріптестері де, шаруалар да оның біліктілігіне, өз ісіне деген адалдығына ерекше құрметпен қарайды. Ол – жан-жануар тілін түсіне білетін, иесіне сенім сыйлайтын, әр істі мұқият атқаратын маман.
Ветеринар мамандығы – төзімділік пен табандылықты, біліктілік пен мейірімді қатар қажет ететін сала. Самал Бақытқызы осы талаптардың бәрін өз бойынан таба отырып, күн сайын қоғамға пайда келтіріп, талай жанның алғысын алып жүр.
Самал ханымның туған жері – Түркістан облысы, Бәйдібек ауданы, Алғабас елді мекені. Ол бала күнінен жануарларға ерекше мейіріммен қарап, олардың денсаулығына алаңдайтын. Сол бала арманы оны Мұхтар Әуезов атындағы Оңтүстік Қазақстан Мемлекеттік Университетіне жетеледі. Ол осы оқу ордасында ветеринариялық медицина мамандығын меңгеріп, білікті маман атанды.
2012 жылдың қыркүйек айында туған жеріне оралып, Бәйдібек ауданы, Бөген ауылдық әкімдігінде бас маман – ветеринариялық дәрігер қызметін бастады. Бұл қызметтің жауапкершілігі орасан зор еді, өйткені ауыл шаруашылығы үшін мал басының саулығы аса маңызды.
2017 жылдан бері Шымкент қаласының Ветеринариялық қызметінде еңбек етіп келеді. Қаладағы ветеринария саласының дамуына өз үлесін қосып, жануарлардың саулығы үшін аянбай қызмет етуде. Оның бұл салада ұзақ жылдар бойы үздіксіз еңбек етуі – өз ісіне деген шынайы махаббатының дәлелі.
Қай ортада жүрсе де, ол өзінің кәсібіндегі биік талап пен адамгершілік қағидаларын қатар ұстап, білімін жетілдіріп, тәжірибесін толықтырып келеді. Оның әрбір ісінен жауапкершілік, жанашырлық пен кәсіби парасаттылық айқын сезіледі.
Самал Бақытқызы – тек білікті маман ғана емес, үш баланың аяулы анасы. Ана болу – ең ұлы міндеттердің бірі. Жұмыс пен отбасылық өмірді тең ұстау, екі жақта да үлгеру – бұл үлкен еңбекті, қажырлық пен төзімді талап етеді. Ол қызметте беделді, үйінде берекелі жан.
Самал ханымның еңбегі – үлкен құрметке лайық. Оның жүрегі жылылыққа, мейірімге толы. Осындай жанашыр мамандардың арқасында мал шаруашылығы дамып, қоғам игілігі үшін маңызды істер атқарылып жатыр Ол – ауыл шаруашылығының дамуына тірек, қоғамның игілігі үшін үнсіз еңбек етіп жүрген нағыз еңбек адамы.