Қазіргі жаһандану дәуірі жастарға бұрын-соңды болмаған мүмкіндік сыйлағанымен, еңбек нарығында бәсекелестік арттырып, мамандық таңдауда жаңа талаптар қойып отыр. Технологиялардың дамуы, экономикалық үдерістердің жылдам өзгеруі, цифрлық трансформация — жастардың кәсіби бағытын айқындауда басты факторға айналды.
Қазақстанда да жастар саясатының негізгі бағыттарының бірі — дұрыс кәсіби бағдар беру, жұмыссыздықты азайту және кәсіпкерлік белсенділікті арттыру.
Жоғары сынып оқушылары мен түлек жастар үшін мамандық таңдау — өмірлік маңызды шешім. Бүгінгі еңбек нарығы білім мен дағдыға қойылатын талаптарды түбегейлі өзгертті. Мамандық таңдаудағы негізгі қағида — жастардың жеке қабілетін еңбек нарығындағы сұраныспен үйлестіру.
Осы орайда «AMANAT» партиясы Шымкент қаласы Әл-Фараби аудандық филиалының ұйымдастыруымен жастар арасындағы өзекті мәселелерге арналған ашық кездесу өтті. Шараның басты мақсаты — жастардың ой-пікірін тыңдап, олардың қоғамдағы белсенділігін арттыру және өзекті проблемаларды бірлесе шешу жолдарын талқылау.
Кездесуге қалалық мәслихат депутаты, партия фракциясының мүшесі Бөкейхан Әбішев, Әл-Фараби аудандық партия филиалының атқарушы хатшысы Ердәулет Жүнісбек, сондай-ақ «Жоғары медицина колледжі» МКК директоры Ғалымжан Әбішев қатысты.
Диалог барысында студент жастар мамандық таңдау, кәсіпкерлікке бет бұру, еңбек нарығындағы жаңа мүмкіндіктер және жастар арасындағы жұмыссыздық мәселелерін қозғады. Өз кезегінде қатысушылар жастарға арналған мемлекеттік қолдау бағдарламалары, білім мен тәжірибені ұштастыру тетіктері жөнінде пікір алмасты.
Кездесу соңында ұйымдастырушылар мұндай ашық форматтағы диалог алаңдары жастардың азаматтық ұстанымын қалыптастыруға, инициативасын қолдауға және қоғам өміріне белсенді араласуына жол ашатынын атап өтті.
«AMANAT» партиясы жастардың ойы мен ұсыныстарын әрдайым ескеріп, олардың әлеуетін ел дамуы жолында тиімді пайдалануға басымдық береді», — деді кездесуде Әл-Фараби аудандық филиалының атқарушы хатшысы Ердәулет Жүнісбек.
Мұндай басқосулар алдағы уақытта да жалғасын табады деп жоспарлануда.
Жастар — елдің болашағы ғана емес, бүгінгі экономиканың негізгі қозғаушы күші. Мамандық таңдауда дұрыс бағыт беру, кәсіпкерлікке қолдау көрсету, еңбек нарығындағы жаңа мүмкіндіктерді ұсыну — жастардың әлеуетін ашуға жол ашады.
Ал жұмыссыздық мәселесін шешу үшін мемлекет, білім беру ұйымдары және жұмыс берушілер бірлесіп әрекет етуі қажет.
Қазіргі заман жастары үшін ең бастысы — үздіксіз білім алу, жаңа дағдыларды меңгеру және еңбек нарығындағы өзгерістерге бейім болу.