Үшінші мегаполисте интернеттің қолжетімділігін арттыру бағытындағы жұмыс қарқын алған. Оның ішінде мобильді және оптикалық-талшықты интернеттің таралу аясын кеңейту жұмыстары да бар.Қала аумағындағы интернет сапасы төмен 30 тұрғын алап анықталып, оптика тарту жұмыстары жүргізілуде. Осы ретте Нұртас, Тассай, Таскен, Пахтакор шағын аудандарындағы 4 көшеге кабель жүргізіліп, интернетке қосылды. Ал Ақжайық және Достық шағын ауданына талшықты оптика желісі толық 100% жүргізілді. Сонымен қатар, жеке инвестор «Fishnet» ЖШС-мен келіссөздер жүргізу нәтижесінде инвестор есебінен 2021–2023 жылдары шалғай орналасқан елді мекендерді сапалы интернетпен қамтуға қаржы қарастырылып отыр. Нәтижесінде, 80 000 үй сапалы интернет желісімен қамтылмақ.
Қаратау ауданына қарасты 2000-нан астам үй бар. Ауданға қарасты Асар шағынауданын оптикалық желі арқылы сапалы интернетпен қамту жұмыстарын жүргізу мақсатында қала әкімдігімен жеке инвесторлар тартылған болатын.
Бүгінгі таңда «i-LinkNet» жауапкершілігі шектеулі серіктестігі тарапынан Асар шағынауданына оптика желісі толық жүргізіліп, 2000-ға жуық үйге талшықты оптика желісі, жалпы саны 200 шақырымды қамтитын абоненттік кабель тартылды. Нәтижесінде, Асар шағынауданындағы 9000-ға жуық адамды сапалы интернетпен қамтуға толық мүмкіндік бар.
Бүгінде өтініш қалдырған 200-ге жуық үйге интернет желісі қосылып, тұрғындардан қосымша өтініштер қабылдануда. Егерде тұрғындар тарапынан кеңжолақты интернет желісіне қосылуға (8 775 395 29 02) нақты өтінімдер берілген жағдайда, «i-LinkNet» компания тарапы шағынауданды толыққанды талшықты оптика желісімен (200 Мбит/сек жылдамдығына дейін) қамтамасыз ете алады.
Алдағы уақытта, «i-LinkNet» компаниясы Самал-3 шағынауданын (100%) талшықты оптика желісімен қамту жұмыстары жүргізіледі.