Елорда күні мерекесіне орай Үшінші мегаполисте «UKO-S Star» ЖШС - металл бөшкелерін шығаратын кәсіпорын ашылды. Аталмыш нысанның ашылу салтанатына қала әкімі Мұрат Әйтенов онлайн форматта қатысты.
Аталмыш жиын барысында сөз алған қала әкімі шаһаржың экономикалық әлеуетін арттыруға үлесін қосып жүрген азаматтардың істеріне сәттілік тілеп, ризашылығын білдірді.
Осы орайда, «UKO-S Star» ЖШС - металл бөшкелерін шығаратын кәсіпорынның жұмысына тоқталып өтсек. Аталмыш кәсіпорынға 500 млн теңге инвестиция тартылып, 40 адам жұмыспен қамтылған. Зауыт заманауи технологиялармен жабдықталған. Өндіріс орнында сыйымдылығы 150 литр болатын 100000 дана болат бөшке өнімдерін шығару жоспарланып отыр. Мемлекеттің қолдауымен «Тассай» индустриялық аймағынан 2 гектар жер телімі берілген.
Атап өтейік, Елорда күні мерекесіне орай Шымшаһарда 11 инвестициялық жоба іске қосылған болатын. Олар: «UKO-S Star» ЖШС, «СК-АЙМАҚ» ЖШС, «TABA INDUSTRIAL» ЖШС, «KASPY STEEL» ЖШС, «Балкибеков» ЖК, «SAGITEX GROUP» ЖШС, «AgroPark» ЖК, «Барыс 2007» ЖШС, «Халаев» ЖК, «Зертас» және «Алтынсай» ШҚ.