ҚР Су ресурстары және ирригация министрі Нұржан Нұржігітов Үкімет отырысында алдағы айларда оңтүстік өңірдегі суармалы егістіктерде су тапшылығы байқалуы мүмкін екенін айтты деп жазады RGmedia.kz тілшісі.
— Еліміздегі су ресурстарының ең ірі тұтынушысы – ауыл шаруашылығы саласы, оның үлесіне жалпы су пайдаланудың 60 пайыздан астамы тиесілі. Ауыл шаруашылығына жыл сайын бөлінетін 15 текше километр судың шамамен 12 текше километрі тұрақты суаруға жұмсалады, оның 98 пайызы еліміздің бес оңтүстік облысына – Алматы, Жетісу, Жамбыл, Түркістан және Қызылорда облыстарына тиесілі. Көктемгі ауа райының қалыптан тыс жылы болуына байланысты ағымдағы вегетациялық кезең орташа жылдық мерзімдермен салыстырғанда 20 күнге ерте басталды, — деді ол өз баяндамасында.
Сондай-ақ министр биыл егістіктерде су тапшылығы болуы ықтимал екенін атап өтті.
— Ағымдағы вегетациялық маусымның ерекшелігінің бірі – вегетация алдындағы кезеңде топырақ ылғалдылығының жеткіліксіздігі болды. Бұл фактор оңтүстік өңірлердегі су шаруашылығы жағдайына айтарлықтай әсер етті. Топырақтың үстіңгі қабатындағы ылғалдың аз болуына байланысты егістіктердің вегетацияның бастапқы кезеңіндегі суға қажеттілігі орта есеппен 50 пайызға артты. Бұл суармалы көздерге қосымша жүктеме түсіріп, алдағы айларда су тапшылығы қаупін күшейтіп отыр, - деді Нұржан Нұржігітов.