24 жылға сотталған экс-шенеунік Қуандық Бишімбаев қамауда отырған мекеме өзіне ынталандыру шараларын қолданбағаны үшін сотқа шағымданды. Бұл туралы Ішкі істер министрлігі Қылмыстық-атқару жүйесі комитетінен хабарлайды.
- Жазасын өтеуші сотқа мекеме әкімшілігі оған көтермелеу бермейді деген өтінішпен жүгінді. Қолданыстағы заңнамаға сәйкес, сотталғандарға жазаны өтеу тәртібі бұзылған жағдайда көтермелеу қолданылмайды. Аталған сотталған адамның бір рет тәртіп бұзғанын ескере отырып, оған көтермелеу болмайды, - делінген комитеттің баспасөз қызметі таратқан хабарламада.
Осылайша сот Қуандық Бишімбаевтың арызын қанағаттандырмады.
Айта кетсек, бұған дейін Қуандық Бишімбаевтың бостандықта жүргені жайлы қауесет тараған еді.
Сондай-ақ былтыр күзде экс-шенеунік Қуандық Бишімбаевтың түрмеде жұмысқа тұрмағаны айтылды.
Еске сала кетейік, азаматтық некеде болған әйелін өлтіргені үшін Қуандық Бишімбаев 24 жылға сотталды.