Жеке басты куәландыратын мерзімі өткен құжаттарды ауыстыру ағымдағы жылдың 10 шілдесіне дейін ешқандай әкімшілік шарасыз жүзеге асырылады. Елімізде төтенше жағдай алынғаннан кейін Қазақстан азаматтарының мерзімі өткен құжаттарын ауыстыру тәртібі өзгерді. Яғни, Шымкентте де мерзімі өткен жеке құжаттарының қолданыс мерзімі 2 айға ұзартылды. Яғни, ескі құжатпен де қажетті жәрдемақылар мен төлемдерді еш мәселесіз ала алады.
Халыққа қызмет көрсету орталықтарының жұмысы 26 наурыздан бастап тоқтатылды және қазақстандықтар жеке басын куәландыратын құжаттарды (жеке куәлік, паспорт) уақытылы қайта рәсімдеуге мүмкіндігі болмады.
Қазақстан Республикасы Үкіметінің 2020 жылғы 11 мамырдағы №283 қаулысына сәйкес елде төтенше жағдай кезінде қолданылу мерзімі өткен жеке басты куәландыратын құжаттар күші жойылған күннен бастап күнтізбелік алпыс күн бойы жарамды саналатын болды.
Бұдан соң жеке басты куәландыратын құжаттардың қолданылу мерзімі 10 шілдеге дейін ұзартылды және Қазақстан азаматтары қызмет, зейнетақы, әлеуметтік жәрдемақылар және басқа да төлемдерді алу үшін мемлекеттік органдар мен басқа да ұйымдарға қолданылу мерзімдері өткен құжаттармен жүгіне алады. Жаңасын алғанша өзіңізге қажетті мәселелердің шешімін ескі құжаттармен ала аласыз.