Өткен жылдың 21 мамырында KATEAD қауымдастығы мен «Отандастар» қоры арасында қол қойылған хаттама негізінде Түркияның Стамбул қаласында қазақ тілін оқытатын курс ашылды. Аталмыш курс тегін әрі онлайн режимде жүргізіледі.
«Курсқа қажетті жабдықтар өткен жылдың 10 желтоқсанында Қазақстаннан жөнелтілді. Қазақ тілі курсы Стамбулдың екі аймағында ұйымдастырылады: біріншісі Зейтинбурн ауданында, ал екіншісі Бағджылар ауданында. Бұл екі жер Түркия қазақтарының көп қоныстануына байланысты таңдалды. Бағджылар ауданында курс қазақтар негізін қалаған Қожа Ахмет Ясауи білім және аймақтық қорының ғимаратында өтеді. Бұл үшін KATEAD қауымдастығы мен Қожа Ахмет Ясауи қоры арасында 3 жыл мерзімге арналған хаттамаға қол қойылып, Қазақстаннан жеткізілген дәрістерге арналған жабдықтар сол жерге де апарылды», - дейді KATEAD төрағасы Ертолқын Гайретуллах.
