Жасөспірімдер арасындағы суицид Сайрамда – 27 пайызға, Түлкібаста – 50 пайызға, Бәйдібекте 200 пайызға жетті. Бұл туралы бүгін облыстық прокуратураның бастамасымен ұйымдастырылған «Бала қауіпсіздігі және білім саласындағы тәуекелдер» тақырыбындағы І ашық форумында облыс прокурорының бірінші орынбасары Артықбек Пашаев айтты.
– Жалпы кәмелетке толмағандардың арасындағы құқық бұзушылық жағдайы жақсарғанымен, осы санаттағы қылмыстар саны артқан аумақтар бар. Мысалы, жасөспірімдермен жасалған құқық бұзушылық Түркістанда – 66 пайызға, Кентауда – 74 пайызға, Бәйдібекте 60 пайызға артса, оларға қарсы жасалған қылмыстар Арыста – 80 пайызға, Түлкібаста – 71 пайызға, Отырарда 66 пайызға артқан. Ал, жасөспірімдер арасындағы суицид Сайрамда – 27 пайызға, Түлкібаста – 50 пайызға, Бәйдібекте 200 пайызға артуда, – деді прокурордың бірінші орынбасары.
Өңірдің білім саласына жауапты басшылар мен құқық қорғау органдары қызметкерлері жиылған алқалы форум облыс әкімі Ө.Шөкеевтің қатысуымен өтті.