Сарыағаш ауданында “Таза Қазақстан” республикалық экологиялық акциясы аясында тағылымды сенбілік өтті. Шараға Түркістан облыстық мәслихатының депутаты, фракция жетекшісі, сондай-ақ мүгедектігі бар азаматтардың құқықтарын қорғау жөніндегі комиссия төрағасы Салыбек Қайрат Келесұлы, партия белсенділері және “Қазақ аналары – Дәстүрлі жол” қоғамдық бірлестігі қатысты.
Сенбілік барысында Жібек жолы ауылдық округі, Жібек жолы ауылында орналасқан Р-1 каналы қоқыстан тазартылып, шаруашылықтардың егістігіне су кедергісіз жетуіне жағдай жасалды. Сонымен қатар ағаш көшеттері отырғызылып, өзен арналары тазартылды.
Игі шараның мақсаты – қоршаған ортаны қорғау, табиғатты аялау, экологиялық мәдениетті қалыптастыру және туған жердің тазалығы мен көркеюіне үлес қосу. Табиғатты қорғау – баршамызға ортақ міндет екені тағы бір мәрте насихатталды.