Мемлекеттік кірістер комитеті жеке тұлғалардың салығын әкімшілендіру басқармасының басшысы Дина Құсайынова "блогерлер тізіміне" енген 5 адамның 69 миллион теңге төлегенін айтты. Бұл туралы RGmedia.kz тілшісі ҚазАқпаратқа сілтеме жасап хабарлайды.
Оның сөзінше, салық төлеуге қатысты ескерту 80 мыңнан аса жеке тұлғаға, соның ішінде 594 блогерге жіберілген.
"Соның ішінде 5 адам қосымша 900 миллион теңгенің салық декларациясын тапсырып, 69 миллион теңге төледі", – дейді Дина Құсайынова.
Еске салайық, бұған дейін мемлекеттік кірістер комитеті қазақстандық блогерлерге салық бойынша хабарламалар жібергені туралы хабарлаған едік. Оларға жалпы құны 53 миллиард теңгені төлеуге бір ай уақыт берілгенін мәлімдеді. Осыдан соң желіде салықтан жалтарған блогерлердің тізімі пайда болды.
Көп ұзамай мемлекеттік кірістер комитеті қателік жібергендерін мойындап, блогерлердің салығы қайта есептелетінін мәлімдеген.