Ауылды жерлердегі мемлекеттік қызметшілерді қысқарту жұмыс сапасына кері әсер етеді. Сенатор Ольга Перепечина Премьер-Министрдің атына жолдаған депутаттық сауалында осылай деді.
– Назар аударатын тағы бір мәселе – білікті кадрлардың жетіспеушілігі. Бюджеттің төртінші деңгейін енгізу жағдайында ауылды жерлердегі аппаратты 25 пайызға қысқарту жағына байқап келу керек. Себебі онда бір адам бірнеше қызметті атқарып отыр. Оларды қысқарту жұмыс сапасына кері әсер етеді, – деді ол Парламент Сенатының отырысында жолдаған депутаттық сауалында.
Сенатр сондай-ақ бюджеттен берілетін нысаналы трансферттер ауыл әкімдіктерінің шығыстарын қаржыландырудың негізгі көзі болып қалатынын атап өтті. Еске сала кетсек, бұған дейін Мемлекет басшысы Қасым-Жомарт Тоқаев 1 қыркүйекте Қазақстан халқына арнаған Жолдауында Үкіметке мемлекеттік аппарат және квази-мемлекеттік сектор қызметкерлерін қысқарту мерзімін жеделдетуді тапсырған болатын. Жолдауда айтылғандай биыл олардың саны 10 пайызға, ал келесі жылы 15 пайызға қысқартады. Солай 2021 жылы шенеуніктердің санын 25 пайызға қысқарту мәселесін шешу көзделген.