Қытайдың Ухан қаласы коронавирус эпидемиясының ең басты таралу ошағы болғандықтан ол жерден келетін қазақстандық студенттер 14 күнге оқшауланады.
- "Қытайда тұратын қазақстандық студенттер мен азаматтардың мәселесіне келер болсақ, біздің үкімет Қытай үкіметіне Ухан қаласынан біздің 61 студентімізді эвакуациялауды ұйымдастыру бойынша нота жолдады. Арнайы бортта біздің дәрігерлер қорғаныс костюмінде болады, сондай-ақ, олар келген соң дезинфекция жасалады, ал студенттер 14 күнге оқшауланады", - деді Қазақстанның бас санитарлық дәрігері Жандарбек Бекшин.
Қазақстандық студенттерді елге қайтару үшін Ухан қаласына арнайы борт жіберіледі деп күтілуде. Қазіргі уақытта, қазақстандық билік елден шығатын ұшақтың ұшу мәселесі бойынша Қытай тарапының жауабын күтуде.
- "Біз туристер мен басқа да азаматтарымыздың қайтарылғанын күтіп отырмыз. Сол себепті шекараны жабу мүмкін емес", - дейді Қазақстанның бас санитарлық дәрігері Жандарбек Бекшин.