Мемлекет басшысы Қасым-Жомарт Тоқаев Қазақстан-Иран бизнес форумына қатысып, екі ел арасындағы экономикалық және инвестициялық қарым-қатынастың дамуына ерекше мән берді. Президент Иран Ислам Республикасының Президенті Масуд Пезешкианға қазақ-иран достығын нығайтуға қосқан үлесі үшін алғыс білдірді.
Форум барысында екіжақты сауда айналымының өсу әлеуеті, инвестициялық жобалар мен транзиттік-логистикалық ынтымақтастық мәселелері талқыланды. Былтырғы көрсеткіш бойынша тауар айналымы 340 миллион доллардан асты, биыл бұл сома бірнеше есе артады деп күтілуде. Елдеріміз тауар айналымын бірінші кезеңде 1 миллиард долларға, кейін 2 миллиард долларға жеткізуді жоспарлап отыр. Сонымен қатар, Тегеран қаласында Қазақстанның Сауда үйін ашу бастамасының маңызы атап өтілді.
Қасым-Жомарт Тоқаев ауыл шаруашылығы, көлік-логистика, цифрлық экономика және жасанды интеллект салаларындағы серіктестіктің дамуына тоқталды. Атап айтқанда, Иранның іскерлік қауымдастығы ашқан 350-ден астам кәсіпорын табысты жұмыс істеп жатыр. Жаңа жобалар, оның ішінде Шахид Раджаи портында көлік-логистика терминалын салу, Ақтау және Құрық порттарын Иран порттарымен байланыстыру, сондай-ақ ауыл шаруашылығы өнімдері мен заманауи өндірістерді дамыту жоспарлануда.
Мемлекет басшысы Каспий теңізінің экожүйесін сақтау, экология және өңірлік ынтымақтастық мәселелеріне де баса назар аударды. Сонымен қатар, Қазақстан цифрлық дамуды жетілдіру, жасанды интеллект саласында халықаралық орталықтар құру және инновациялық қалаларды дамыту арқылы жаңа технологиялық серпін беруге ниетті.
Иран Президенті Масуд Пезешкиан екі ел арасындағы ғасырлар бойы қалыптасқан достық қарым-қатынас пен әлеуметтік-экономикалық ынтымақтастықтың жаңа кезеңге қадам басқанын атап өтті. Келісімдер аясында кеме қатынасы, консорциум құру, бірлескен өндіріс зауыттары, экспорттық парктер және аймақтық сауда жобалары жүзеге асырылмақ.
Форум Қазақстан мен Иран арасындағы стратегиялық әріптестікті тереңдетуге, сауда, инвестиция, логистика және технология салаларын дамытуға тың серпін береді деп күтілуде.