Қарағанды облысында кәмелет жасқа толмаған қызды өгей әкесі күштеп тұрмысқа берген. Бұл туралы "НеМолчиKZ" қорының негізін қалаушы Дина Таңсәрі өзінің Telegram-дағы арнасында жазды деп хабарлайды RGmedia.kz тілшісі.
"15 жастағы қызды өгей әкесі еркінен тыс 38 жастағы ер адамға "күйеуге берген". Қыздың ағасы бізге жүгінді: 5 күн бойы зорлық көрген қыз жүрек ауруымен ауыратын туған әкесіне қашып кете алған. Олар бірден арыз жазыпты", - деп жазды Дина Таңсәрі.
Аталған дерек бойынша қылмыстық іс тергеліп жатыр.
"Бұл қылмысқа қатысы бар барлық тұлға анықталып, тергелді. Тергеу аясында болған жайттың мән-жайын анықтау үшін қажетті сот сараптамалары тағайындалды.
Қазақстан Республикасының Қылмыстық-процессуалдық кодексінің 201 бабына және тергеу мүддесіне сай басқа ақпарат жарияланбайды", - делінген Қарағанды облысы ПД баспасөз қызметі таратқан мәліметте.