Алматы облыстық полиция департаменті Талғарда 16 жастағы Шерзат Болаттың (Полат) өліміне қатысты қылмыстық істі тергеу аяқталғанын хабарлады.
"Қылмыстық істің барлық материалдарымен тараптар танысты. Іс прокурорға сотқа жолдау үшін жіберілді. Қылмыстық істің көлемі 62 томды құрады. Онда жиналған барлық дәлелдемелер, сараптамалық қорытындылар, сұрақ-жауап хаттамалары және басқа да маңызды материалдар бар. Әрбір тергеу әрекеті қылмыстық заңнама талаптарына сәйкес жүргізілді. Барлық кезеңде заңдылық, ашықтық және объективтілік қамтамасыз етілді, - делінген хабарламада.
Тергеу барысында 40 сот сараптамасы жүргізіліп, шамамен 200 куәгерден жауап алынған. Барлық күдіктілердің айғақтарын оқиға орнында тексеру, беттестіру және қылмыстың барлық мән-жайын анықтауға бағытталған басқа да тергеу әрекеттері орындалды.
Қылмысқа қатысы бар барлық адамдарға құқықтық баға беру үшін 8 бейнематериал зерттелді.