Елімізде әлеуметтік желі арқылы алаяқтық жасайтындардың саны азаймай тұр. Түрлі қитұрқы әрекеттерге барып, оңай жолмен ақша табатын интернет алаяқтарымен күрес күннен-күнге күшейе түсуде.
Өзгелердің әлеуметтік парақшаларын бұзып кіріп, бірде ең жақын досың болып, бірде туысқаның болып, сеніміңе кіріп, қаржылай көмек сұрайтын айлакерлердің қулығына құрық бойламайтыны анық. Дегенмен Түркістандық полицейлер бұл бағытта нақты жоспарлармен жұмыс атқаруда.
Осы орайда Түлкібас АПБ қызметкерлері аудан тұрғындарымен тығыз байланыс орнатқан. Түлкібастық сақшылар жедел-профилактикалық іс-шараларды жандандырып, сақтық шараларын да мықтап қолға алған. Әлеуметтік желілерде әрбір азаматқа интернет алаяқтарынан сақтану жолдарын түсіндіріп, арнайы тақтайшаларда жазбаша және бейнематериал арқылы ауызша түрде олардың жоспарларын әшкерелейтін нұсқаулықтар мен ескертпелерді кеңінен таратуда. Сондықтан банк қосымшасын пайдалану мен ақша аудару операциясын жасауда сауаттылықтарыңызды арттырып, полицейлердің ескертуіне құлақ асыңыздар.
Түркістан облысы ПД баспасөз қызметі