Қазақстанда ұялы байланыс нөмірлерін пайдалану тәртібіне қатысты жаңа талап енгізілді. Бұдан былай SIM-карта биометриялық тексеруден өтпейінше жұмыс істемейді.
Жаңа ережеге сәйкес, әрбір SIM-карта нақты бір азаматтың атына тіркелуі тиіс. Байланыс картасын бұрынғыдай дүкендерден сатып алуға болады, алайда оны іске қосу үшін бет-әлпетті тану арқылы биометриялық тіркеуден өту қажет.
Смартфон пайдаланатын азаматтар тіркеу рәсімін ұялы байланыс операторының мобильді қосымшасы арқылы орындай алады. Ал интернетке қолжетімділігі жоқ немесе батырмалы телефон қолданатындар операторлардың қызмет көрсету орталықтарына жүгінеді.
Сонымен қатар бір адамға рәсімделетін SIM-карталардың ең жоғары саны 10-мен шектелді.
Жаңа талап интернет-алаяқтықтың алдын алу мақсатында енгізілді. Соңғы уақытта қаскөйлер тіркелмеген телефон нөмірлерін жиі пайдаланғаны атап өтілді.