Ұлттық статистика бюросы елімізде қарт адамдар санының артқанын айтты. Бюро таратқан мәлімет бойынша 2024 жылы Қазақстанда қартаю индексі 31,1 құраған, бұл өткен жылмен салыстырғанда 1,6 пайыздық тармаққа жоғары екен (2023 жылы 29,5), деп хабарлайды rgmedia.kz тілшісі.
Бұл дегеніміз 0 мен 15 жас аралығындағы әрбір 100 балаға 65 жастан асқан 31,1 қариядан келеді деген сөз.
Мамандар сондай-ақ қариялардың қай өңірде көп екенін де жариялады. Көрсеткіштің ең жоғары деңгейі Солтүстік Қазақстан облысына тиесілі. Мұнда тіркелгені – 78,1, одан кейін Шығыс Қазақстан (76) және Қостанай облыстары (66,4).
Қартаю индексінің ең төменгі көрсеткіші Маңғыстау облысында, онда 100 балаға 65 жастан асқан 15,2 қарттан келеді. Сондай-ақ аталған көрсеткіштің төмен мәні Түркістан облысында (15,9) және Шымкент қаласында (16,1) тіркелген.
Бір қызығы қалалық жерлерде қартаю индексі ауылдық жерлерге қарағанда жоғары – тиісінше 33,4 және 27,5.