Сенатор Марат Қожаев премьер-министр Олжас Бектеновке жол қозғалысы ережелерін бұзғаны үшін жаза қолдану тәсілдерін қайта қарауды ұсынды деп хабарлайды RGmedia.kz тілшісі. Бұл бастаманың себебі - Алматыда жол қозғалысы ережелерін бұзушылардың көбеюі және ережені өрескел бұзушыларға ықпал ететін тиімді шаралар болмауы.
"Айыппұлдар көліктің иесіне тағайындалады, алайда жүргізушінің бұған дейінгі құқықбұзушылықтары есепке алынбайды. Бұл ереже өрескел ереже бұзушыларға жылдар бойы жазадан қорықпай, жол қозғалысы ережелерін елемеуге мүмкіндік береді. Көріп отырғанымыздай, үнемі ереже бұзатындар үшін қазіргі айыппұлдар тиімді шара емес. Сондықтан жазалау тәсілдерін қайта қарау қажет", – деді депутат.
Осыған байланысты Қожаев мына шараларды ұсынды:
- Жол қозғалысы ережелерін 10 және одан көп рет бұзған жүргізушілерге теориялық емтиханды қайта тапсыруды міндеттеу;
- Қайталанатын құқықбұзушылықтар үшін жазаны қатаңдату, жүргізуші куәлігін уақытша тоқтату мүмкіндігін қарастыру;
- Жүргізушінің заңбұзушылық санына байланысты айыппұл жүйесін дифференциялау;
- Өрескел құқықбұзушыларға 50 пайыздық айыппұл жеңілдігін алып тастау.