Өңірдегі ішімдіксіз ауылдар қатарына Дермене, Табысты, Жаңажол, Нұртас, Мәдениет ауылдары қосылды деп жазады ҚазАқпарат.
Онлайн режимде халыққа есеп берген Түркістан облысы полиция департаментінің басшысы Мұрат Қабденов өңірде қылмыс деңгейі азайғанын жеткізді. Мәселен, облыста өткен жылы тіркелген қылмыстық құқық бұзушылық 3,2 пайызға төмендеген. Ұрлық — 38,7 пайызға, мал ұрлығы — 43,7 пайызға азайған. Пәтер ұрлығын жасаған 8, алаяқтық қылмыстарын жасаған 23, мал ұрлаумен айналысқан 16 қылмыстық топ ұсталған.
Ол сондай-ақ криминогендік жағдайдың тұрақты болуы үшін жеке құрам алдағы уақытта да жұмыла іске кірісетінін жеткізді. Одан бөлек өңірде ішімдіктен бас тартқан ауылдардың да қатары артып келеді.
– Облыс бойынша 61 ауыл ішімдік сатудан бас тартты. Мұнда құқық бұзушылық пен қылмыстың алдын алу маңызды рөл атқарады. Кейінгі жылдары аталған ауылдарда қылмыс тіркелмеген, тәртіп пен тыныштық орнаған. Осындай берекелі ауылдар өзгелерге үлгі болуы керек, - деді полиция генералы.